ಬೆಂಗಳೂರು: ಬೆಲೆ ಏರಿಕೆ, ಕಮಿಷನ್‌ ದಂಧೆ, ಭಯೋತ್ಪಾದನೆ, ಬರಗಾಲ, ರೈತರ ಆತ್ಮಹತ್ಯೆಯಂತಹ ಗಂಭೀರ ವಿಷಯಗಳು ರಾಜ್ಯವನ್ನೇ ಆಹುತಿ ಪಡೆಯುತ್ತಿರುವಾಗ ಸಿದ್ದರಾಮಯ್ಯ ಮತ್ತು ಡಿ.ಕೆ. ಶಿವಕುಮಾರ ಸಿಎಂ ಕುರ್ಚಿ ಕಿತ್ತಾಟದಲ್ಲಿ ಮಗ್ನರಾಗಿದ್ದಾರೆ ಎಂದು ಬಿಜೆಪಿ ಕಾಲೆಳೆದಿದೆ.
ಈ ಕುರಿತು ವ್ಯಂಗ್ಯ ಚಿತ್ರವೊಂದನ್ನು ಸೃಷ್ಟಿಸಿ ಟ್ವೀಟ್‌ ಮಾಡಿರುವ ಕರ್ನಾಟಕ ಬಿಜೆಪಿ, ಪವರ್‌ ಶೇರ್‌, ನೆಕ್ಸ್ಟ್‌ ನಾನೇ, ನಾನೇ ಆಗ್ಬೇಕು ಮುಂದಿನ ಸಿಎಂ ಎಂದು ಡಿಕೆಶಿ ಎನ್ನುತ್ತಿದ್ದರೇ, ನಾ ಬಿಡಲ್ಲ, ನಾನೇ ಸಿಎಂ, ಪೂರ್ಣಾವಧಿ, ಎಂಎಲ್‌ಎ ನನ್‌ ಜೊತೆ ಎಂದು ಸಿದ್ದರಾಮಯ್ಯ ಹೇಳುತ್ತಿದ್ದಾರೆ ಎಂದು ವ್ಯಂಗ್ಯ ಚಿತ್ರದ ಮೂಲಕ ಹೇಳಿದೆ.
ಅಲ್ಲದೇ ಕಾಂಗ್ರೆಸ್‌ನಲ್ಲಿ ಬಣಜಗಳ ತಾರಕಕ್ಕೇರಿದ್ದು, ವರ್ಗಾವಣೆ ದಂಧೆಗೆ ಸಂಬಂಧಿಸಿದಂತೆ ಮಂತ್ರಿಗಳು ಪರಸ್ಪರ ಕಚ್ಚಾಡುತ್ತಿದ್ದು, ಆಡಳಿತ ಸಂಪೂರ್ಣ ಹಳಿ ತಪ್ಪಿದೆ ಎಂದು ಹೇಳಿದೆ. ಯಾವ ಜಿಲ್ಲೆಯಲ್ಲಿ ಯಾರ ಮಧ್ಯೆ ಬಣ ಜಗಳ ಇದೆ ಎನ್ನುವುದನ್ನು ಪಟ್ಟಿ ಮಾಡಿದೆ.
▪️ಬೆಳಗಾವಿಯಲ್ಲಿ ಸಿಎಂ ಬಣದ ಸತೀಶ್ ಜಾರಕಿಹೊಳಿ, ಡಿಸಿಎಂ ಬಣದ ಲಕ್ಷ್ಮಿ ಹೆಬ್ಬಾಳ್ಕರ್‌ರಿಗೂ ಫೈಟ್.
▪️ವಿಜಯಪುರದಲ್ಲಿ ಸಿಎಂ ಬಣದ ಎಂ. ಬಿ. ಪಾಟೀಲ್ರಿಗೂ, ಡಿಸಿಎಂ ಬಣದ ಶಿವಾನಂದ ಪಾಟೀಲ್ರಿಗೂ ಮುಸುಕಿನ ಗುದ್ದಾಟ.
▪️ಬೆಂಗಳೂರಿನಲ್ಲಿ ಸಿಎಂ ಬಣದ ಜಮೀರ್‌ಗೂ, ಡಿಸಿಎಂ ಬಣದ ಹ್ಯಾರಿಸ್ ನಡುವೆ ದಂಗಲ್.
▪️ಶಿವಮೊಗ್ಗದಲ್ಲಿ ಮೂಲ ಕಾಂಗ್ರೆಸ್ಸಿಗ ಸಂಗಮೇಶ್ ಹಾಗೂ ವಲಸಿಗ ಕಾಂಗ್ರೆಸ್ಸಿಗ ಮಧು ಬಂಗಾರಪ್ಪ ನಡುವೆ ಕಿತ್ತಾಟ.
💣 ಇತ್ತ ಬಿ. ಕೆ. ಹರಿಪ್ರಸಾದ್ ಹಾಗೂ ಸಿದ್ದರಾಮಯ್ಯರ ಗಲಾಟೆ ಬೇರೆಯೇ ಮಟ್ಟದಲ್ಲಿದೆ! ಎಲ್ಲವೂ ಬಯಲಾಗುತ್ತಲೇ ಇದೆ! ಎಂದು ಬಿಜೆಪಿ ಕಿಡಿಕಾರಿದೆ.
