ಕೆರೆಯಲ್ಲಿ ಜಲಾವೃತವಾಗಿರುವ ವಿದ್ಯುತ್ ಕಂಬಗಳ ಬಳಿಗೆ ತೆಪ್ಪದಲ್ಲಿ ಹೋಗಿ ದುರಸ್ತಿಗೊಳಿಸಲು ಮುಂದಾಗಿರುವ ಬೆಸ್ಕಾಂ ಸಿಬ್ಬಂದಿ ಸಾಹಸಕ್ಕೆ ಭಾರಿ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಸ್ವಲ್ಪ ಹೆಚ್ಚೂ ಕಡಿಮೆಯಾದರೂ ಪ್ರಾಣಕ್ಕೇ ಸಂಚಕಾರ ಆಗುವಂಥ ಪರಿಸ್ಥಿತಿಯಲ್ಲಿ ಕೆಲಸ ಮಾಡಿದ್ದಾರೆ. ಕೋಲಾರ ಜಿಲ್ಲೆಯ ಮಾಲೂರು ತಾಲೂಕಿನ ಲಕ್ಕೂರು ಕೆರೆಯಲ್ಲಿ ಈ ದೃಶ್ಯ ಕಂಡುಬಂದಿದೆ. ಜಲಾವೃತವಾಗಿರುವ ವಿದ್ಯುತ್ ಕಂಬದಲ್ಲಿ ಸಮಸ್ಯೆ ಆಗಿದ್ದು, ಅದರ ದುರಸ್ತಿಗಾಗಿ ಬೆಸ್ಕಾಮ್ನ ನಾಲ್ವರು ಸಿಬ್ಬಂದಿ ತೆರಳಿದ್ದು, ಜೀವದ ಹಂಗು ತೊರೆದು ಕರ್ತವ್ಯ ನಿಭಾಯಿಸಿದ್ದಾರೆ.
ಈ ನಾಲ್ವರೂ ತೆಪ್ಪದಲ್ಲಿ ತೆರಳಿದ್ದು, ವಿದ್ಯುತ್ ಕಂಬದಲ್ಲಿ ಇಬ್ಬರು, ಇನ್ನಿಬ್ಬರು ತೆಪ್ಪದಲ್ಲಿ ಇದ್ದುಕೊಂಡು ದುರಸ್ತಿ ಪಡಿಸುವ ಕೆಲಸ ಮಾಡಿದ್ದಾರೆ. ಈ ದೃಶ್ಯಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದ್ದು, ಬೆಸ್ಕಾಂ ಸಿಬ್ಬಂದಿಯ ಕರ್ತವ್ಯಕ್ಕೆ ಎಲ್ಲೆಡೆ ಪ್ರಶಂಸೆ ವ್ಯಕ್ತವಾಗಿದೆ. ಬೆಸ್ಕಾಂ ಸಿಬ್ಬಂದಿ ಸಾಹಸ ಕಾರ್ಯಕ್ಕೆ ವಿದ್ಯುತ್ ನಿಗಮ ಅಧಿಕಾರಿಗಳು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
